முன்னாள் முதலமைச்சர் ஜெயலலிதாவுக்கு இன்று 73-வது பிறந்தநாள்!!

முன்னாள் முதலமைச்சர் ஜெயலலிதாவிற்கு இன்று 73வது பிறந்தநாள்.  தமிழகத்தின் முதலமைச்சர், அ.தி.மு.க.வின் பொதுச்செயலாளர், முன்னணி திரைப்பட நடிகை என ஒவ்வொரு துறையிலும் தனது முத்திரையை ஆழப் பதித்தவர். லட்சக்கணக்கான அ.தி.மு.க. தொண்டர்கள் உள்ளன்புடன் அம்மா என்று அழைத்த சொல்லுக்கு சொந்தக்காரர் ஜெயலலிதா.

இளம் பருவத்திலேயே அறிவாற்றல் மற்றும் சீரிய நினைவாற்றலுடன் விளங்கிய அவர், பத்தாம் வகுப்பு பள்ளியிறுதித் தேர்வில் மாநில அளவில் முதலிடம் பிடித்து தங்கப்பதக்கம் பெற்றார். பரதநாட்டியம், கர்நாடக இசை ஆகியவற்றை முறைப்படி பயின்ற ஜெயலலிதா, குடும்ப சூழல் காரணமாக படிப்பை பாதியிலேயே இடைநிறுத்த நேரிட்டது. வெண்ணிற ஆடை படத்தில் தமிழ் சினிமாவிற்கு அறிமுகமான இவர் ஆயிரத்தில் ஒருவன், கன்னித்தாய், தனிப்பிறவி, முகராசி, காவல்காரன் என எம்.ஜி.ஆருடன் அவர் இணைந்து 28 படங்களில் பெரும்பாலானவை வெற்றிப் படங்களாக அமைந்தன.

சிவாஜி கணேசன், எஸ்.எஸ்.ஆர்., ஜெய்சங்கர், முத்துராமன் உள்ளிட்ட நடிகர்களுடனும், என்.டி.ஆர்., நாகேஸ்வரராவ், தர்மேந்திரா போன்ற முன்னணி நடிகர்கள் பலருடன் தென்னிந்தியாவின் பல மொழிகளிலும் நடித்துள்ளார். 13 ஆண்டுகளில் 127 படங்களில் நடித்துள்ளார் ஜெயலலிதா.

1980ல் எம்.ஜி.ஆர். முன்னிலையில் அ.தி.மு.க.வில் இணைந்த ஜெயலலிதா, சத்துணவுத் திட்ட உயர்மட்டக் குழு உறுப்பினர், கொள்கை பரப்புச் செயலாளர், மாநிலங்களவை உறுப்பினர் ஆகிய பொறுப்புகளை படிப்படியாக ஏற்று செயலாற்றினார். எம்.ஜி.ஆர். மறைவுக்குப்பின் இரண்டாகப் பிளவுபட்டுக் கிடந்த அ.தி.மு.க.வை, தமது விடாமுயற்சியால் இணைத்த ஜெயலலிதா, 1991, 2001, 2011, 2016 ஆகிய தேர்தலில்களில் வெற்றிபெறச் செய்து தமிழகத்தின் முதலமைச்சராகப் பதவி வகித்தார்.

ஜெயலலிதா ஆட்சியின்போது அமல்படுத்தப்பட்ட தொட்டில் குழந்தை திட்டம், மழைநீர் சேகரிப்பு, ரேஷனில் இலவச அரிசி, அம்மா உணவகம், மகளிர் காவல் நிலையம், மாணவர்களுக்கு லேப்டாப், அம்மா உணவகம் போன்ற திட்டங்கள் இன்றும் செயல்படுத்தப்பட்டு மக்கள் பயன்பெற்று வருகின்றனர். பல மாநிலங்கள் இந்தத் திட்டங்களை தேர்தல் வாக்குறுதிகளாக அறிவித்து நடைமுறைப்படுத்தியுள்ளன. 

ஆறு முறை தமிழக முதலமைச்சர், 29 ஆண்டுகள் கட்சியின் பொதுச்செயலாளர், 17 ஆண்டுகள் திரையுலகில் முன்னணி நடிகை... இப்படி எத்தனையோ சிறப்புகளைப் பெற்றவர் அவர். துணிச்சலான பெண்மணி என்று அகில இந்திய அளவில் பேசப்படும் தலைவராக வளர்ந்து, அரசியலில் பெண்களால் சாதிக்க முடியும் என்பதை தமது வாழ்நாளில் நிரூபித்துக் காட்டியவர் தான் இரும்பு பெண்மணி ஜெயலலிதா.

Jeyalalithaa, Amma, AIADMK, Edappadi Palanisamy, Tamil Nadu